Нетаньяху Фолкленд ороллари масаласида Аргентина томонига ўтишга қарор қилди
Исроил бош вазири Биньямин Нетаньяху мамлакатнинг Фолкленд (Мальвин) ороллари бўйича дипломатик позициясини ўзгартириш ҳақида кўрсатма берди. Бу ҳақда Британиянинг The Telegraph нашри хабар тарқатди.
Маълум қилинишича, Нетаньяху исроиллик дипломатларга Буюк Британия ва Аргентина ўртасида узоқ йиллардан буён давом этаётган ҳудудий баҳсда Буэнос-Айрес позициясига яқинроқ ёндашувни қўллашни буюрган.
Янги ёндашувга кўра, Исроил Фолкленд оролларининг келажагини ҳал қилиш учун Буюк Британия ва Аргентина ўртасида тўғридан-тўғри музокаралар ўтказилишини қўллаб-қувватлайди. Шунингдек, Аргентинанинг ушбу ороллар билан тарихий алоқаларини эътироф этади.
Бироқ бу Исроил ороллар устидан Аргентинанинг суверенитетини расман тан олди, дегани эмас. Ҳозирча Тель-Авив Буэнос-Айреснинг ҳудудий даъволарини тўлиқ қўллаб-қувватлашини эълон қилмаган.
Фолкленд ороллари Жанубий Атлантика океанида жойлашган бўлиб, Буюк Британия бошқаруви остида. Аргентина эса ушбу ҳудудни ўзининг ажралмас қисми деб ҳисоблайди. 1982 йилда икки давлат ўртасида ороллар учун уруш ҳам бўлиб ўтган.
