Оқ уй Орбанни БМТ Бош котиби лавозимига таклиф қилди: Украина унинг «вето ва шантаж санъати»ни эслатди
АҚШ маъмурияти Венгрия собиқ бош вазири Виктор Орбан номзодини БМТ Бош котиби лавозимига илгари суришни таклиф қилди. The Wall Street Journal нашрининг уч мамлакатдаги манбаларига таяниб хабар беришича, бу ғояни Россия ва Хитой ҳам қўллаб-қувватламоқда. АҚШ вакили Венгриянинг собиқ бош вазирини «MAGA консерваторлари учун идеал номзод» деб атайди.
Украина Ташқи ишлар вазири Андрей Сибига ушбу хабарларга муносабат билдирар экан, Виктор Орбан ЕИнинг муҳим қарорларини барбод қилиб, йиллар давомида «вето қўйиш ва шантаж қилиш санъатини» сайқаллаганини таъкидлади.
«Биз дунёнинг қолган қисми билан ўзимизнинг бой тажрибамизни бўлишишимиз мумкин: уни керакли вақтда қандай қилиб қаҳвага таклиф қилишни ўргатамиз», — дея қўшимча қилди Андрей Сибига.
Ташқи ишлар вазири 2023 йилда ЕИ саммитида юз берган воқеани назарда тутмоқда. Ўшанда Орбан мажлислар залини тарк этган ва бу Европа Иттифоқи етакчиларига Будапештнинг ветосисиз Украинанинг ЕИга аъзо бўлиши бўйича музокараларни бошлаш ҳақида қарор қабул қилиш имконини берган эди. Кейинчалик ГФР собиқ канцлери Олаф Шольц овоз бериш олдидан Орбанга залдан ташқарида қаҳва ичишни таклиф қилганини тан олган эди.
