Германия ИИВ мамлакатдаги тартибсизликларда экстремистларни айблади
Германия ички ишлар вазири Александер Добриндт мамлакатда содир бўлган тартибсизликларда сўл радикаллар ва экстремистларни айблади.
Бу ҳақда Германия ички ишлар вазири Bild газетасига берган интервьюсида маълум қилди.
«Полиция ходимларимизнинг фидокорона меҳнати туфайли зўравонлик авж олишининг олди олинди. Полиция томонидан танланган — кучларни кенг кўламда сафарбар этиш ва уларни ҳудудлар бўйича марказлашмаган тарзда жойлаштириш стратегияси ўз самарасини берди», — деди Добриндт.
Унинг сўзларига кўра, кечаги норозилик намойишлари нисбатан тинч ўтаётган эди, бироқ зўравонликка мойил сўл гуруҳлар ва мигрантлар муҳитидаги экстремистлар тартибсизликларни бошлаб берган. Вазир қонунбузарлар аниқланиши ва жавобгарликка тортилишини таъкидлади.
«Жамоат тартибини бундай бузганлик учун қатъий жазо чоралари қўлланилиши керак», — дея таъкидлади у.
Эслатиб ўтамиз, 31 октябрь куни Германиянинг Берлин, Гамбург, Кёльн, Мюнхен, Франкфурт-на-Майне, Штутгарт каби шаҳарларини ҳам қўшиб ҳисоблаганда, 30 дан ортиқ шаҳрида ҳукуматга қарши оммавий намойишлар бўлиб ўтган.
