Австрия ва Италия ўртасидаги тоннел қурилишига хакерлар ҳужум қилди
Австрия ва Италияни боғлаши режалаштирилган Бреннер темирйўл тоннелини қураётган BBT SE компанияси хакерлар ҳужумига учради. Бу ҳақда Tiroler Tageszeitung нашри хабар берди.
Нашр маълумотига кўра, ҳужум ортида рус тилида сўзлашувчи Everest хакерлик гуруҳи турган бўлиши мумкин. Гуруҳ компаниялар маълумотларини ўғирлаб, уларни интернетда ошкор қилиш билан таҳдид қилади ва эвазига пул талаб этади.
Компания ҳужум манбасини аниқлаб, уни тармоқдан узган ва тегишли идораларга хабар берган. Ҳозирча киберҳужум тоннел қурилишига таъсир кўрсатмаган.
Бреннер тоннели Австриянинг Инсбрук шаҳрини Италиянинг Фортецца шаҳри билан боғлаши режалаштирилган. У Европадаги муҳим темирйўл йўналишларидан бирига айланиши кутилмоқда.
