Болтиқ денгизида XIX асрда чўкиб кетган шампан ортилган кема топилди
XIX асрда чўкиб кетган кема бортида шампан виноси коллекцияси билан Польша ғаввосларининг ноёб топилмаси ҳисобланади. Қимматбаҳо бутилкалар бузилмаган, деб ёзади Euronews.
Яқинда бир гуруҳ польшалик мутахассислар Болтиқ денгизига экспедиция чоғида эски балиқчи қайиғига ўхшаш чўкиб кетган кемага дуч келишди. Дастлаб ғайриоддий ҳеч нарса сезилмаган бўлса-да, ғаввослар Марек Какай ва Павел Трушинский кемани чуқур ўрганишга қарор қилишди.
Уларнинг қизиқиши бежиз эмас эди: Болтиқ денгизида 190 фут чуқурликда XIX асрда яхши сақланиб қолган елканли кема ичидан шампан коллекцияси топилди.
Ғаввослар гуруҳи раҳбари Томаш Стачуранинг тахминига кўра, чўкиб кетган кемадан топилган буюмлар – минерал сув, чинни, шампан шишалари Стокгольмдаги қироллик дастурхони ёки Санкт-Петербургдаги рус подшоси қароргоҳи томон кетаётган бўлиши мумкин. Бироқ, кема ҳалокатга учраган.
“Мен 40 йилдан ортиқ ғаввослик билан шуғулланаман ва ўз тажрибамга кўра, ҳалокатга учраган кемаларда бир нечта бутилкалар топилади, бироқ мен биринчи марта бундай катта шишалар жамғармасини кўришим”, – деди Стачура Associated Press агентлигига.
Кема бортида спиртли ичимликлардан ташқари Selters ёрлиғи туширилган сопол идишлар ҳам топилган бўлиб, бу минерал сувларнинг шифобахш хусусияти борлигидан далолат беради. Шампан виносининг маркаси ҳали аниқланмаган, бироқ Стачуранинг сўзларига кўра, шампан виноси қопқоғида «R» ҳарфини яққол кўриш мумкин.
Селтерс-ан-дер-Лан компанияси шампан мутахассислари ва минерал сув етказиб берувчилари шишаларни лаборатория синовидан ўтказишга қизиқиш билдиришди. Стачуранинг таъкидлашича, чўкиб кетган кемани текшириш бўйича кейинги қарорлар Швеция расмийлари томонидан қабул қилинади.
