Хитой раҳбари Трампнинг инаугурация маросимида қатнашмайди
Хитой раҳбари Си Цзиньпин АҚШнинг сайланган президенти Дональд Трампнинг инаугурация маросимида қатнашмайди, деб хабар берди CBS News.
2025 йилнинг 20 январида бўлиб ўтадиган маросимда Хитой элчиси ва унинг рафиқаси иштирок этиши кутилмоқда, бу стандарт амалиёт ҳисобланади. Уларга бошқа хитойлик амалдорлар қўшилиши мумкин, лекин Си Цзиньпин эмас.
Хитойнинг Вашингтондаги элчихонаси изоҳ беришдан бош тортди. Трамп жамоаси журналистларнинг изоҳ сўрашига жавоб бермади.
Аввалроқ CБС телеканали Дональд Трамп Си Цзиньпинни ноябрь ойи бошида АҚШ президентлиги сайловларида ғалаба қозонганидан сўнг инаугурацияга таклиф қилгани ҳақида хабар берган эди.
Хитой ҳам, Оқ уй ҳам, Трамп жамоаси ҳам Си Цзиньпинни инаугурацияга таклиф қилиш ҳақида расман гапирмаган.
АҚШ Давлат департаменти маълумотларига кўра, хорижий етакчилар 1874 йилдан бери Америка президентларининг инаугурацияларида қатнашмаган. Дипломатлар одатда маросимларда қатнашадилар.
