Суриянинг янги раҳбари: Трампнинг режаси «барбод бўлади»
АҚШ президенти Доналд Трампнинг фаластинликларни Ғазодан кўчириш ва секторни босиб олиш режаси «охир-оқибат барбод бўладиган оғир жиноятдир». Суриянинг янги президенти Аҳмад аш-Шаръа шундай фикр билдирди.
Илгари Трамп АҚШ Ғазонинг урушдан вайрон бўлган секторини эгаллаб олиши ва фаластинликлар бошқа жойларга кўчирилгандан сўнг уни иқтисодий жиҳатдан ривожлантириши ҳақида баёнот берган эди.
Британия подкастига берган интервьюсида аш-Шаръа Трампнинг таклифи муваффақиятга эришмаслигини таъкидлади: «Менинг фикримча, ҳеч қандай куч одамларни ўз ерларидан ҳайдаб чиқара олмайди. Кўплаб давлатлар бунга уриниб кўрди ва уларнинг барчаси муваффақиятсизликка учради, айниқса сўнгги бир ярим йил ичида Ғазодаги уруш пайтида.»
Аш-Шаръа «80 йиллик бу можаро давомида уларни сиқиб чиқаришга бўлган барча уринишлар барбод бўлганини, кетганлар ўз қароридан афсусланганини» айтди. Ҳар бир авлод ўзлаштирган Фаластин сабоғи ўз ерини сақлаб қолиш муҳимлигидадир.»
