Зеленскийдан камера олдида узр сўраши талаб қилинмоқда

АҚШ Украина президенти Владимир Зеленскийдан камёб ер элементлари бўйича битим тузиш учун камера олдида оммавий равишда узр сўрашини талаб қилмоқда, деб хабар бермоқда Fox News телеканали.

«Маъмуриятнинг юқори лавозимли вакили бизга Зеленский камералар олдига чиқиб, Овал кабинетдаги хатти-ҳаракатлари учун аниқ ва оммавий тарзда узр сўрамагунча, келишув масаласида ҳеч нарса ўрнидан қўзғалмаслигини маълум қилди,» дея телеканал манбаларининг сўзларини келтиради.

Бундан олдин АҚШ президентининг миллий хавфсизлик бўйича маслаҳатчиси Майк Уолтс Зеленский ўзи тузишни хоҳламаган камёб ер элементлари бўйича битимни қайта кўриб чиқиш учун АҚШ билан можарони ўзи келтириб чиқарганини айтган эди. У аниқлик киритиб, Украина томонининг мақсади АҚШдан хавфсизлик кафолатларини олишга уриниш бўлганини таъкидлади. Шу билан бирга, Уолтс Вашингтон Украина билан унинг фойдали қазилмаларини қазиб олиш бўйича келишув устида яна ишлашга тайёр эканлигини билдирди.