Хитойда 100 тонна тирик тимсоҳ аукционда сотилаяпти! Нарх ва шартлар ҳушингизни олади
Шенчженнинг Наншан тумани халқ суди маҳаллий қарздор компаниядан мусодара қилинган 100 тонна тирик сиам тимсоҳини сотиш бўйича аукцион эълон қилди. Бу ҳақда South China Morning Post (СCМП) нашри хабар берди.
Унинг маълумотларига кўра, партиянинг бошланғич нархи 4 млн юанни (тахминан 550 минг доллар) ташкил этди, харидор судралиб юрувчиларни фермадан мустақил равишда олиб кетиши керак. Жониворлар 2005 йилда ташкил этилган Guangdong Hongyi Crocodile Industry фирмасига тегишли бўлиб, унга аввалроқ матбуотда «Тимсоҳлар худоси» лақабини олган бизнесмен Мо Сзюнжун раҳбарлик қилган, деб ёзади нашр.
Тимсоҳлар компания молиявий мажбуриятларини бажара олмаганидан кейин мусодара қилинган ва ҳозирда суд орқали тугатилиши керак. Савдо шартларига кўра, харидор сув ҳайвонларини сунъий кўпайтириш учун лицензияга эга бўлиши ва бундай катта партияни ташиш учун инфратузилмага эга бўлиши керак. Акс ҳолда, 300 минг юань (41 минг доллар) миқдоридаги закалат қайтарилмайди. Аукцион Alibaba Judicial Auction Platform платформасида ўтказилмоқда ва 9 майга қадар давом этади.
Битта сиам тимсоҳининг оғирлиги 200 дан 500 кг гача, сотувда 200 дан 500 тагача бўлиши мумкин. Тимсоҳлар озиқ-овқат, чарм ва косметика саноатида, жумладан, вино ва биологик фаол қўшимчалар ишлаб чиқаришда қўлланилади, дея тушунтиради газета.
