Европа АҚШ билан савдо урушига тайёр
Европа Иттифоқи АҚШ билан савдо тўсиқларини камайтириш бўйича музокараларни давом эттирмоқда, аммо янги Америка божлари жорий этилган тақдирда қатъий чоралар кўришга тайёрлигини билдирмоқда.
Бу ҳақда CNBC Европа Комиссиясининг ички ҳужжатига асосланиб хабар берди.
Европа Иттифоқининг савдо бўйича вакили Олоф Гиллнинг таъкидлашича, Европа Иттифоқи иккала томон иқтисодиётига зарар етказадиган тариф урушларини бошлашдан кўра, келишувга эришишни маъқул кўради. Бироқ, унинг сўзларига кўра, агар музокаралар натижасиз якунланса, «барча вариантлар кўриб чиқилиши мумкин».
Брюссел ва Вашингтон ўртасидаги музокараларнинг асосий мавзуси Доналд Трамп томонидан илгари жорий этилган божлар, жумладан пўлат, алюминий ва автомобилларга қўйилган 25 фоизлик тарифлардир.
Tramp 2 апрель куни 185 мамлакат ва ҳудуддан келтирилаётган товарларга божхона тўловлари жорий этилишини эълон қилди. 9 апрелда эса у музокараларга тайёрлигини билдирган 75 давлатга нисбатан божлар оширилишини 90 кунга тўхтатиб қўяётганини маълум қилди. Бу давлатлар учун 10 фоизлик импорт тарифлари амал қилади.
