Пентагон Европани огоҳлантирди
Қўшма Штатлар бундан буён Европа мамлакатларининг хавфсизлигига «ягона кафолат» бўла олмаслиги ҳақида Пентагон раҳбари Пит Хегсет маълум қилди.
«АҚШнинг Европа хавфсизлигига ягона кафолат бўлган даври ўтди», – деди мудофаа вазири Пенсилвания штатидаги АҚШ Қуруқлик қўшинлари коллежида сўзлаган нутқида. – «Бу аллақачон пишиб етилган эди. Европа ҳарбий жиҳатдан фаоллашиши ва етакчиликни ўз қўлига олиши керак.»
АҚШ мудофаа идораси раҳбарининг айтишича, Европа давлатларининг ўз хавфсизлигини таъминлашдаги роли кучайиши билан АҚШда бошқа йўналишларга эътибор қаратиш учун имкониятлар пайдо бўлади – биринчи навбатда, Осиёда Хитой таъсирининг кучайишига қарши туриш учун.
Хегсет, шунингдек, НАТО бўйича Европа иттифоқчиларидан ҳарбий харажатларни ялпи ички маҳсулотнинг 5 фоизигача оширишни талаб қилишини таъкидлади.
«Президент Трампнинг иккинчи президентлик муддатининг дастлабки 100 куни давомида дунёга йўллаган хабари жуда аниқ: «Америка яна фаолиятда,» – дея қўшимча қилди вазир.
