Ўзбекистон яна самолётлар ишлаб чиқара бошлайди
“Навоий” ЭИЗ директори Ҳабиб Абдуллаевнинг Sputnik’га маълум қилишича, лойиҳанинг умумий қиймати 30 миллион долларга баҳоланмоқда. Биринчи самолёт 2025 йил октябрь ойида чиқарилиши режалаштирилган.
Тошкентда бўлиб ўтган ИННОПРОМ кўргазмасида “Навоий” эркин иқтисодий зонаси дирекцияси” АЖ ва Россиянинг «Первое» тажриба-конструкторлик бюроси МЧЖ ўртасида меморандум имзоланган.
Ҳужжатда СП-30 лойиҳаси асосида фуқаролик типидаги бошқариладиган ва учувчисиз самолётларни ишлаб чиқаришни жойлаштириш назарда тутилган. Айтилишича, октябрь ойидан бошлаб йилига 100 та самолёт ишлаб чиқариш бошланади.
Ишлаб чиқариш Ўзбекистоннинг ички эҳтиёжларини қондиришга, шунингдек, Яқин Шарқ, Марказий ва Жанубий Осиё мамлакатларига экспорт қилишга йўналтирилган.
Маълумот учун, СП-30 бутунлай металлдан ясалган, икки ўриндиқли самолёт бўлиб, у Россияда энг кўп ишлаб чиқарилган енгил самолётлардан биридир.
