Италияда Этна вулқони яна «уйғонди»
Сицилиянинг шарқий соҳилларида жойлашган Этна вулқони отилишни бошлади. Натижада, Этна устида вулқон кулидан иборат булут пайдо бўлди, деб ёзмоқда ANSA агентлиги.
Қайд этилишича, Сицилиянинг айрим ҳудудларини кул қоплаган. Этнадан отилган кул устунлари бир неча километрга етмоқда. Минтақа ҳудудида ҳаво транспорти учун хавфнинг қизил даражаси эълон қилинган. Шу билан бирга, маҳаллий Катания аэропорти штат режимида ишлашда давом этмоқда.
Катанияда жойлашган Этна обсерваторияси ҳузуридаги Миллий геофизика ва вулқоншунослик институти маълумотларига кўра, вулқоннинг ҳаракатга келишига пирокластик оқим (вулқон газлари, кул ва тоғ жинслари бўлакларининг аралашмаси) сабаб бўлган. Ушбу оқим Этна жануби-шарқий кратерларидан бирининг қулаб тушиши натижасида юзага келган.
The Independent’нинг ёзишича, вулқон ҳаракатга келишидан олдин ерости силкинишлари кузатилган. Олимлар магманинг кучли ҳаракати билан боғлиқ сейсмик тебранишлар даражаси жуда юқори эканини маълум қилди. Мутахассислар яқин атрофдаги аҳоли пунктлари учун эҳтимолий хавфларни баҳолаш мақсадида вазиятни кузатишда давом этмоқда.
