… Кунора пора билан қўлга тушаётган …
* Одил судьялар бор!
Судьялар тўғрисида халқ онгида салбий фикр шаклланиб бўлган.
Отнинг калласидек ойлик, оддий фуқаро орзу қила олмайдиган имтиёзлар, бола-чақасига имтиёзлар ва ҳоказолар берилишига қарамасдан кунда, кунора пора билан қўлга тушаётган судялар…
Айтган сўзи учун блогерга 8 йил, журналистга 12 йил қамоқ жазоси бериб, 8 ёшли гўдакларни 3 йил давомида зўрлаб келган «қўтос» раҳбарларга 6 ой озодликдан чеклаш бераётган судьялар.
Халқ дардини айтган «Дамас»чининг мазасини қочириб бўлиб, яна «Шу гапларни айтишингиз «Панельний»да бир кеча ётишингизга арзийдими?» деб «Ашаддий жиноятчи»нинг устидан кулган судьялар….
«Журналистларни ж… дейиш ҳақорат эмас», деган «ғалатироқ» судьялар…
Аммо шунча «ғалати»ликлар ичида ОДИЛ СУДЬЯЛАР ҳам бор!
«Энг одил судья» танлови ғолиби Ориф Мамаюносович Пардаев раислик қилаётган Жиноят ишлари бўйича Самарқанд шаҳар судида ана шундай судьялар бор.
Учта иш бўйича суд бўлдим. Саводсиз фермерлар, этикдўзлар, сақичфурушлар, қурутфурушлар ўрнатган, аҳмоқона жойларда турган радарлар туширган сурат ва видеотасвирларга асосан, саводсиз ГАИ ходимлари менга нисбатан тузган баённомалар, молиявий жазо қўллаш талаб қилинган қарорлар судьялар А.Тўйчиев, Р.Очилов ва М.Баҳриевлар томонидан БЕКОР ҚИЛИНДИ.
Ориф Пардаев билан суҳбатимизда кейинги пайтларда «Радарчилар» ҳаддидан ошгани, бемаъни ва бемантиқ қарорлар билан кишилар жаримага тортилаётганини айтиб, «Юртдошларимиз бизга мурожаат қилсалар, ана шунақа бемаза қарорларни бекор қилиб берамиз», деди.
Автомобилга ўрнатилган «Мультирадар» деган нарса ГАИ ходимларининг «ов»идан бошқа нарса эмаслигини, бу нарса ноқонуний эканини айтишди.
«Мультирадар»га тушган ҳайдовчилар! Иккиланмасдан судга мурожаат қилинг, суд сизни ҳимоя қилади ва ГАИ ходимларининг отнинг калласидек жарима тўлашингиз ҳақидаги қарорларини «брак» қилиб беради!
Э, деманг, «Озгина пул экан-ку, тўлаб қўяверай», деманг, «Судга берсам, ўзимни сарсон қилишади» ҳам деманг, суд бир кунда шикоятингизни кўриб, сизнинг фойдангизга қарор чиқариб беради ва бола-чақангиз ризқи бўлган ҳалол пулингизни ҳаромга чиқармайсиз!
Менга айнан «Мультирадарчилар» ёзган 1.875.000 сўмлик жаримани суд бекор қилди! Бу менинг бир ойда оладиган пенсия пулим эди. Яхшиям судьялар бор, одил ва ҳалол судьялар бор!
Яна битта гап: радарга тушганимиздан кейин УЧ КУНДАН кеч келган ҳар қандай жаримани ТЎЛМАС ЭКАНМИЗ! (Ваҳоланки, БИР ЙИЛДАН КЕЙИН ҳам жарима келиб ётибди! Ўзбекнинг соддалигидан ҳаромхўрлар роса фойдаланишаяпти!)
Судларга ишонинг ва мурожаат қилинг!
P.S.: айни кунларда халқимиз ҳадик, хавотир ва умид билан натижасини кутаётган судда ҳам қозиларнинг одил бўлишини тилаб қоламиз!
Каримберди Турамурод
