Рамазон Темиров бир йилга дисквалификация қилинди
Ўзбекистонлик UFC жангчиси Рамазон Темировнинг дисквалификацияси муддати расман эълон қилинди. Бу ҳақда Combat Sports Anti-Doping (CSAD) ташкилоти хабар бермоқда.
Темировда тақиқланган триметазидин (TMZ) — препарати аниқланган эди. Ушбу модда юрак етишмовчилиги ва бошқа юрак касалликларида қўлланиладиган, тақиқланган UFC ADP рўйхатидаги гормонал ва метаболик модуляторлар синфига киради. триметазидиндан ҳар қандай вақтда ҳам қўлланиши тақиқланган.
Тақиқланган модда мавжуд бўлган намуна Темировдан 2025 йил 12 июн куни Таиланднинг Пхукет шаҳридаги мусобақадан ташқари даврда, кейин эса 2025 йил 4 июлда айнан Пхукетда қайта олинган. Темиров биринчи тести натижаси мусбат чиққани ҳақида хабардор қилинмагани сабабли, иккала ҳолат ҳам ягона қоидабузарлик сифатида кўрилади.
CSAD бу мавзуда Темиров билан атрофлича суҳбатлашган ва у триметазидиндан фойдаланиш фактини очиқчасига тан олган.
У бу моддани шифокор кўрсатмаси билан қабул қилганини айтган. Шу билан бирга, у қўллашдан олдин препаратнинг ҳолатини текширмаган ва уни тайинлаган шифокорга тестдан ўтган спортчи эканини айтмаган.
