Ҳиндистонда автобус ёниб кетиб, 20 киши ҳалок бўлди
Ёнғин тез тарқалгани сабабли йўловчилар ундан чиқиб кетишга улгурмаган.
Ҳиндистоннинг Раджастхан штатидаги Жайсалмер туманида йўловчи автобуси ёниб кетиб, камида 20 нафар одам ҳалок бўлди. Яна бир неча киши оғир тан жароҳати билан шифохонага ётқизилган.
Маълумотларга кўра, ҳодиса Тайят қишлоғи яқинида, Жайсалмер–Жодхпур йўлида рўй берган. Автобусда жами 50 дан ортиқ йўловчи бўлган. Йўлга чиққанидан кўп ўтмай транспорт воситасининг орқа қисмида тутун чиққан ва бир неча дақиқа ичида бутун автобусни олов қамраб олган.
Гувоҳларнинг айтишича, ёнғин жуда тез тарқалгани сабабли кўплаб йўловчилар чиқиб кетишга улгурмаган. Айниқса, орқа қисмида ўтирганлар чиқиш эшикларига етиб бормаган. Шундай қилиб, автобус ичидан 20 дан зиёд шахснинг жасади топилган.
Терговчилар ҳодисага автобуснинг кондиционер тизимидаги қисқа туташув сабаб бўлганини тахмин қилмоқда. Ҳукумат ўлим сабабларини аниқлаш ва ҳалок бўлганларнинг шахсини идентификация қилиш учун ДНК таҳлилларини бошлаган.
Раджастхан бош вазири Шугат Сингх ушбу фожиа муносабати билан марҳумлар оилаларига таъзия билдирди ҳамда автобуслар хавфсизлигини текшириш бўйича махсус комиссия тузишни буюрди.
