Байден Украина учун учинчи жаҳон уруши бошланиши хавфига боришни рад этган — Йенс Столтенберг
Россиянинг Украинага кенг кўламли босқини бошланган пайтда NATO бош котиби лавозимини эгаллаб турган Йенс Столтенберг Тhe Sunday Times нашрига берган интервюсида Зеленскийнинг «Украина ҳаво ҳудудини ёпиш» илтимоси рад этилгани сабаблари ҳақида сўзлаб берди.
«Зеленский менга Киевдаги бункеридан қўнғироқ қилди, йўлда рус танклари ҳаракатланаётган эди. “Сиз NATO қуруқликдаги қўшинларини Украинага киритмаётганингизни тушунаман, гарчи бунга қўшилмасам ҳам. Аммо, илтимос, мамлакатимиз ҳаво маконини ёпинг. Рус самолётлари, дронлари ва вертолётлари учиб, бизни бомбардимон қилмасин”, деди Украина президенти», — дея эслайди Столтенберг.
Бироқ Столтенберг Зеленскийга рад жавоби берган, чунки бу NATO самолётларининг хавфсизлиги учун Россия ва Беларусдаги ҳаво мудофаа тизимларини йўқ қилишни талаб қилган бўларди.
«Агар ҳавода рус самолёти ёки вертолёти пайдо бўлса, биз уни уриб туширишга мажбур бўлардик, бу эса NATO ва Россия ўртасида ҳақиқий урушни англатади. Биз бунга тайёр эмасмиз. Ўша пайтда АҚШ президенти бўлган Жо Байден айтганидек, биз Украина учун учинчи жаҳон уруши хавфига бормаймиз», — деди алянснинг собиқ бош котиби.
Столтенбергнинг фикрича, Россия билан тўғридан-тўғри урушга киришмасдан Украинани қўллаб-қувватлаш ҳали ҳам “тўғри йўл” ҳисобланади. Шунингдек, унинг таъкидлашича, агар алянс Қрим аннекcиясидан сўнг дарҳол Киевга ҳарбий ёрдам кўрсатганида, эҳтимол Россиянинг кенг кўламли босқини умуман юз бермаган бўларди.
