Россия ва Украина йирик асирлар алмашинувига тайёрланмоқда

Украина Миллий хавфсизлик ва мудофаа кенгаши котиби Рустем Умеров 1 200 нафар украиналикни Россия асирлигидан озод қилиш бўйича келишувларга эришилганини маълум қилди. Бу ҳақда у Телеграмда ёзди.

Умеровнинг сўзларига кўра, Украина президенти топшириғига кўра, у Туркия ва Бирлашган Араб Амирликларидаги ҳамкорлар воситачилигида алмашинув жараёнини тиклаш бўйича маслаҳатлашувлар ўтказган. Натижада томонлар 1 200 кишини озод қилишни назарда тутувчи Истанбул келишувларини фаоллаштиришга келишиб олдилар.

Унинг таъкидлашича, яқин орада техник маслаҳатлашувлар бўлиб ўтади, унда процессуал ва ташкилий жиҳатлар келишиб олинади. Умеровнинг таъкидлашича, асирликдан қайтиши керак бўлган украиналиклар Янги йил ва Рождество байрамларини уйда кутиб олишлари учун иш тўхтовсиз олиб борилмоқда.

11 ноябрь куни Умеров Туркияга «айирбошлаш масаласини ечиш» учун келган.