Ўзбекистон рақамли иқтисодиётига йирик сармоя: 300 млрд сўм жалб этилди!
Дунёнинг нуфузли халқаро сармоядорларидан бири бўлган VR Capital компаниясидан Uzum платформасига киритилган тахминан 300 миллиард сўм миқдоридаги маблағ унинг рақамли банкинг ва тўлов инфратузилмасининг тараққиёти учун сарфланади.
Иккинчи битим ва ишонч
Бу VR Capital ва Uzum ўртасидаги иккинчи ҳамкорлик келишуви бўлиб, аввалроқ, 2025 йилда VR Capital Uzum’нинг асосий инвесторларидан бирига айланганди. Бу ҳолат фонднинг Ўзбекистоннинг шиддат билан ривожланаётган рақамли иқтисодиётига бўлган ишончи юқорилигини кўрсатади.
Жалб қилинган сармоя Uzum’нинг финтех йўналиши — рақамли банкинг, тўловлар ва истеъмол кредитлаш каби устувор йўналишларнинг ривожланишини жадаллаштиради. Шунингдек, бу битим Ўзбекистон ва АҚШ ўртасидаги иқтисодий алоқаларнинг мустаҳкамланиб бораётганининг ёрқин далилидир.
Сўмнинг халқаро мавқеи ошмоқда
Uzum асосчиси Жасур Жўмаев янги молиялаштириш нафақат Uzum экотизимини, балки мамлакат иқтисодиётини рақамлаштириш суръатларини ҳам кучайтиришини таъкидлади. Муҳими, молиялаштириш миллий валютада ажратилди — бу халқаро ҳисоб-китоблар ва корпоратив молиялаштиришда сўмнинг мавқеи юксалиб бораётганини намоён этади. VR Capital Group президенти Ричард Дейтс ҳам Uzum’нинг ўсиш суръатидан ҳайратда эканлигини билдириб, платформанинг рақамли трансформацияга қўшаётган ҳиссасини қўллаб-қувватлашини айтди.
Uzum онлайн савдо, рақамли ва анъанавий банкинг, шунингдек, финтех хизматларини ягона экотизимга бирлаштириб, мамлакатнинг энг йирик рақамли платформасини ривожлантиришни давом эттирмоқда. Ҳозирда ушбу экотизимдан 20 миллиондан ортиқ ўзбекистонликлар фаол фойдаланмоқда.
