Вашингтон янги стратегияга эътибор қаратмоқда
АҚШ Европа билан муносабатларни қайта кўриб чиқиш, Ғарбий ярим шарда ўз таъсирини тиклаш ва Ҳинд-Тинч океани минтақасида ҳарбий қудратини оширишни мақсад қилган. Бу ҳақда Reuters АҚШнинг миллий хавфсизлик стратегиясига таяниб хабар берди.
АҚШ президенти Дональд Трамп маъмурияти Монро доктринасини қайта тиклаш зарурлигини таъкидламоқда. Бу доктрина Европа давлатларининг Шимолий ва Жанубий Америка мамлакатлари ишларига аралашмаслиги тамойилига асосланган.
Бунинг эвазига Вашингтон Европа ички сиёсатга аралашмасликни ваъда қилган. «Бу Монро доктринасининг Трамп давридаги натижаси бўлиб, бу АҚШ куч-қудратини ва устуворликларини тиклашнинг оқилона ва самарали усули ҳисобланади.
Бу АҚШ хавфсизлик манфаатларига мос келади», дейилади ҳужжатда. Reutersга кўра, янгиланган стратегия Трампнинг Иккинчи жаҳон урушида кейин АҚШ етакчилигида шаклланган тартибни ўзгартириш истагини яққол кўрсатади.
Шу билан бирга, Вашингтонни Хитойнинг Лотин Америкаси давлатларидаги таъсирининг кучайиши ташвишга солмоқда. Вашингтон Тайван бўйича Хитой билан келиб чиқиши мумкин бўлган можарони олдини олиш учун АҚШ ва унинг иттифоқчиларининг қудратини оширишни режалаштирмоқда.
Atlantic Councilнинг Лотин Америкаси бўйича катта таҳлилчиси Жейсон Марчак Вашингтоннинг аввалги тартибга қайтиши энди имконсизлигини таъкидлади. Янгиланган миллий хавфсизлик стратегиясида Европага «цивилизацион йўқотиш» хавфи таҳдид солаётгани ва агар улар Вашингтоннинг иттифоқчиси бўлиб қолишни истаса, ўзгариш зарурлиги айтилган.
Шунингдек, АҚШ Ғарбий идентификацияни сақлаб қолиш тарафдори эканини билдирган. Бундан ташқари, АҚШ ҳукумати Украинадаги вазиятни тартибга солиш ва Россия билан «стратегик барқарорлик»ни тиклашга қизиқиш билдирмоқда.
