Россиядаги ҳарбий ҳаракатларда иштирок этган ўзбекистонлик эркак судланди. У урушда ҳалок бўлганларнинг жасадларини йиғиш каби қатор ишлар билан шуғулланган
Ўзбекистонлик эркак Россияда бўлиш қоидаларини бузганлик учун жиноий жавобгарликдан қўрқиб, Россия Мудофаа вазирлиги билан шартнома имзолаган. Бир неча ой давомида у позицияларни ушлаб туриш, ҳалок бўлганларнинг жасадларини йиғиш, ҳудудни муҳандислик жиҳозлаш вазифаларини бажарган ва отишмаларда қатнашган.
Жиноят ишлари бўйича Сирдарё судида ёлланганликда айбланган фуқарога нисбатан иш кўриб чиқилди, деб хабар бермоқда UzNews.uz мухбири суд ҳукмига таяниб.
Иш ҳужжатларидан маълум бўлишича, 2024 йил декабрь ойида эркак пул топиш мақсадида Россияга борган. Вақт ўтиб, у Россия Федерацияси ҳудудида ноқонуний бўлгани учун полиция ходимлари томонидан ҳибсга олинган. Жиноий жавобгарликка тортилиш ва депортация қилинишдан қўрқиб, у ҳарбий хизматни ўташ учун шартнома имзолаган.
2025 йил апрель ойида ўзбекистонлик эркак Россия Федерацияси Мудофаа вазирлигининг ҳарбий қисмларидан бирига қабул қилинган ва Украина ҳудудидаги жанговар ҳаракатлар зонасига юборилган. Унга қурол-яроғ, ҳарбий анжомлар ва алоқа воситалари берилган. Жанговар ҳаракатлар пайтида у яраланган ва Россия ҳудудидаги ҳарбий госпиталларда даволанган.
2025 йил июль ойида эркак Ўзбекистонга қайтиб келган ва у ерда ҳуқуқ-тартибот идоралари томонидан қўлга олинган. Унинг уяли телефонини текшириш ва кўздан кечириш жараёнида жанговар ҳаракатларда иштирок этгани ва хорижий давлатлар қуролли кучлари таркибида бўлганини тасдиқловчи фото ва видеоматериаллар аниқланган.
Суд мажлисида айбланувчи ўз айбига тўлиқ иқрор бўлди ва қилган ишидан пушаймон бўлганини билдирди. Суд унинг ҳаракатларини ЖКнинг 154-моддаси 1-қисми (ёлланиш) билан квалификация қилиб, бир қатор чекловларни белгилаган ҳолда уч йил муддатга озодликни чеклаш жазосини тайинлади.
