Куба ҳукумати АҚШ босими остида шу йилнинг ўзида қулаши мумкин
Куба ҳукумати АҚШ босими остида шу йилнинг ўзида қулаши мумкин. Бу ҳақда The New York Times хабар берди.
«Трамп маъмурияти томонидан янги санкциялар жорий этилгач, Куба Мексика ва Венесуэладан келадиган нефт манбаларидан айрилди, яқин орада эса туризм ва чет элдаги тиббий миссиялар орқали олинадиган валютага кириш имконидан ҳам маҳрум бўлиши мумкин. Вашингтон айнан шу йўналишда иш олиб бормоқда», дея ёзмоқда нашр.
The New York Times’нинг қайд этишича ёқилғи етказиб беришнинг тўхтатилиши Кубада вазиятни кескинлаштирган. Америкаликларнинг Мадурога босими ва божлар билан таҳдид қилиши “Озодлик ороли”ни нефт етказиб берувчилари — Венесуэла ва Мексикадан узиб қўйган. Таҳлилчиларга кўра, халқаро етказиб беришларсиз мамлакат охир-оқибат фалаж ҳолатга тушади.
«Кубалик амалдорлар асабийлашмоқда, чунки улар ўз инқилоблари якунига етаётганини англай бошлаган», — дея қайд этади Тhe New York Times.
Нашр узоқ йиллар давомида Кубани ўрганиб келган тарих профессори Ада Феррернинг фикрини ҳам келтиради. Унинг айтишича, аввал ҳам режим «тез орада қулайди» деган башоратлар бўлган, бироқ ҳар сафар улар ўзини оқламаган. Аммо бу сафар мамлакатни ташқи томондан қўллаб-қувватлайдиган куч йўқ.
«Энди Кубанинг қулаб бораётган иқтисодиётини қутқаришга тайёр ҳомий йўқ, Совет Иттифоқи парчаланганидан кейин бу ишни Венесуэла қилаётган эди. Аммо Николас Мадуро АҚШ томонидан қўлга олинганидан кейин барчаси ўзгарди», — дейди эксперт.
