Месси 2026 йилги мундиалда иштирок этмаслиги мумкин

Лионел Месси келаси ёзда бўлиб ўтадиган 2026 йилги жаҳон чемпионатида Аргентина миллий терма жамоаси сафида майдонга тушмаслиги мумкин. The Touchline нашри хабарига кўра, 38 ёшли ҳужумчи мундиалда иштирок этмаслик вариантини ҳам жиддий кўриб чиқмоқда. Бу ҳақда euro-football.ru манбаси маълум қилди.

Қарор, аввало, Мессининг жисмоний ҳолатига боғлиқ бўлади. Манбага кўра, у ўзини тўлиқ — 100 фоиз тайёр деб ҳис қилмаса, ҳатто “1 фоиз” камлик сезилса ҳам, жаҳон чемпионатига бормасликни маъқул кўриши мумкин.

Шунингдек, Месси MLS даражаси мундиал олдидан энг юқори спорт формасига чиқиш учун етарлича рақобатли эмас, деб ҳисобламоқда. Шу боис у бу омилни пухта жисмоний тайёргарлик орқали қоплаш зарурлигини яхши тушунади.

2026 йилги жаҳон чемпионатида Аргентина амалдаги чемпион сифатида ўз унвонини ҳимоя қилади. 2022 йилги жаҳон чемпионати финалида “альбиселесте” Франция миллий терма жамоасини 3:3 ҳисобидаги дурангдан сўнг пенальтилар сериясида мағлуб этган эди.