Нима учун Хоманаий бункерга яширинмади?
The Financial Times нашрининг хабар беришича, Хоманаийни йўқ қилиш тўғрисидаги қарор нафақат ҳарбий техника имкониятларига таянган, балки энг аввало сиёсий характерга эга бўлган.
Эронга зарба беришга тайёргарлик бир неча ой давомида олиб борилган, бироқ операциянинг якуний конфигурацияси АҚШ ва Исроил разведка хизматлари шанба куни эрталаб Хоманаий ва унинг яқин атрофидаги шахслар Теҳрондаги қароргоҳида бўлишини тасдиқлаганидан сўнг ўзгарган.
Кенг кўламли можаро бошланганидан кейин ликвидация жараёни сезиларли даражада мураккаблашиши тахмин қилинган эди. Эрон томони олдиндан ишлаб чиқилган эвакуация сценарийларини тезкорлик билан фаоллаштириши ва Исроил ўқ-дорилари етиб бора олмайдиган ер ости бункерларига яшириниши мумкин эди.
«Ҳизбуллоҳ» раҳбари Ҳасан Насруллоҳдан фарқли ўлароқ, Хоманаий доимий равишда ер остида яширинмаган. Шунга қарамай, уруш шароитида у хавфсизлик чораларини кўриб келган. Манбанинг сўзларига кўра, унинг бункердан (унда иккита бункер бўлган) ташқарида камдан-кам ҳолларда бўлиши «имкониятлар дарчаси»ни юзага келтирган: агар у ушбу мустаҳкамланган бошпаналар ичида бўлганида, Исроил ихтиёридаги қуроллар учун қўл етмас бўлиб қолар эди.
Омма олдида АҚШ Президенти музокараларнинг чўзилаётганидан норозилигини намойиш этган бўлса-да, манбанинг таъкидлашича, Дональд Трамп шахсий суҳбатларда Теҳроннинг жавобларидан ҳафсаласи пир бўлган — айнан мана шу омил ҳарбий сценарийни яқинлаштирган. Исроил радиоэлектрон разведка маълумотларига, жумладан, бузиб кирилган видеокузатув камералари ва мобил тармоқларга кириш имкониятига эга эди. Бироқ америкаликлар томонидан олинган агентлик маълумотлари ҳал қилувчи устунликни таъминлади.
Бу ҳолат бир неча соат давомида ҳавода бўлган Исроил авиациясига ўттизга яқин юқори аниқликдаги зарбаларни бериш имконини берди. Ҳарбийлар ҳужум вақтининг танланишига алоҳида урғу бердилар: операция эрталаб амалга оширилган. Уларнинг таъкидлашича, айнан шундай зарба Эроннинг юқори жанговар шайлигига қарамай, тактик кутилмаганлик самарасини қайта таъминлаган.
