АҚШни тиз чўктириш режаси: Эроннинг сўнгги қасоси қандай бўлади?
Эрон Талваса деб номланган кўп босқичли ҳарбий операция режасини ишлаб чиққан. Ундан кўзланган асосий мақсад — навбатдаги қуролли тўқнашувни нафақат АҚШ ва Исроил, балки минтақадаги араб давлатлари учун ҳам имкон қадар «оғриқли» қилишдир. Бу ҳақда The New York Times нашри ўз манбаларига таяниб хабар бермоқда.
28 февраль куни ҳалок бўлган олий раҳнамо Али Хаменеи томонидан тасдиқланган ушбу режага кўра, Вашингтонга босим ўтказиш учун араб давлатларининг иқтисодиёти, туризми, энергетикаси ва кема қатнови йўналишларига зарбалар бериш кўзда тутилган.
Операциянинг уч босқичи
Мазкур режа Эронга қайта ҳужум қилинган ёки Оятуллоҳ вафот этган тақдирда ишга туширилиши керак эди. У қуйидаги уч босқични ўз ичига олган:
1. Исроилга тўғридан-тўғри зарбалар бериш.
2. Араб давлатларидаги АҚШ ҳарбий базаларига ҳужум уюштириш.
3. Фуқаролик объектлари: аэропортлар, меҳмонхоналар ва элчихоналарга зарба бериш орқали зиддиятни эскалация қилиш.
Теҳрон ҳозирги уруш бошланганидан кейин бир неча кун ичида ушбу учтала босқични ҳам амалга оширган. Хаменеи низо шароитида бошқарувни йўқотмаслик учун ҳар бир муҳим лавозимга олдиндан тўрт нафардан ворис тайинлаб қўйган.
Таҳлилчилар буни Американинг минтақадаги иттифоқларини парчалашга қаратилган, пухта ўйланган ва узоқ вақт давомида тайёрланган стратегия деб атамоқда. Аввалроқ Financial Times ҳам Хаменеининг ўлими Яқин Шарқда тартибсизликлар ва дунё бозорида кескин тебранишлар келтириб чиқариши ҳақида ёзган эди.
