Нега эркаклар ва аёллар кийимида тугмалар турли томонда жойлашган?
Кундалик ҳаётимизда кийим киямиз-у, лекин кичик бир деталга эътибор бермаймиз: эркаклар кўйлагида тугмалар ўнг томонда, аёлларникида эса чап томонда қадалади. Бу шунчаки дизайнми ёки бунинг ортида чуқур тарих борми? Бу анъананинг илдизи узоқ ўтмишга, кийим-кечак фақат аслзодалар ва бой-бадавлат қатлам учун махсус тикилган даврларга бориб тақалади. Ўша пайтларда зодагон аёлларнинг либослари жуда мураккаб бўлиб, улар мустақил равишда кийина олишмаган.
Хонимларга кийинишда доимо хизматкорлар ёрдам берган. Хизматкор аёл (одатда ўнг қўл билан ишлагани учун) қаршисида турган бекасининг тугмаларини тез ва осон қадаши учун тугмалар чап томонга тикилган. Бу қулайлик хизматкорлар учун ўйлаб топилган эди. Эркаклар эса, ижтимоий мавқеидан қатъи назар, кўпинча мустақил равишда кийинишган. Тугмаларнинг ўнг томонда бўлиши ўнг қўл билан тугма қадашда энг қулай усул ҳисобланган.
Бундан ташқари, яна бир қизиқарли тахмин бор: эркаклар доимо қуролланган бўлишган. Ўнг қўлида қилич ёки қурол тутган жангчи, чап қўли билан кўйлагининг тугмаларини осон ечиши ёки қадаши учун ҳам ўнг томон танланган. Бугунги кунда аёллар ҳам, эркаклар ҳам мустақил кийинишади, аммо тикувчилик саноатида бу кўҳна анъана ҳалигача сақланиб келмоқда. Бу деталь эркаклар ва аёллар гардероби ўртасидаги энг асосий фарқлардан бири бўлиб қолмоқда.
