Макрон: Трампнинг гаплари на одобга, на стандартларга тўғри келади!
Франция Президенти Эммануэль Макрон Ҳормуз бўғозини ҳарбий йўл билан очишга уринишни реал эмас деб баҳолади. Унга кўра, Франция ҳеч қачон бу масалани куч ишлатиб ҳал қилиш тарафдори бўлмаган. Бу ҳақда у кеча, 2 апрель куни журналистларга берган интервьюсида айтиб ўтди.
Макроннинг сўзларига кўра, бўғозни ҳарбий операция орқали очиш ғояси амалда ишламаслиги мумкин, чунки бу қанча вақт олиши номаълум ва шу ҳудуддаги давлатлар қирғоқлари хавф остида қолади.
Франция Президентининг таъкидлашича, Париж уруш бошлангандан бери бўғозни очиш масаласини Эрон билан келишув орқали, яъни музокаралар йўли билан ҳал қилиш тарафдори бўлиб келмоқда. Унинг фикрича, бунинг учун аввало можаронинг кескин босқичи тугаши ва кейин музокаралар қайта бошланиши керак.
Макрон, шунингдек, “суғурта миссияси” деб аталган ташаббусни яна бир бор эслатган. Бу ташаббус ҳарбий ҳужум эмас, балки мудофаа характеридаги чоралар бўлиб, унда турли давлатлар иштирок этиб, можародан кейин танкерлар ва портлар хавфсизлигини таъминлашга қаратилади.
Шунингдек, Франция Президенти Трампни ушбу можарода ўзига ўзи зид чиқишда айблаган.
“Жиддий бўлиш керак. Агар жиддий бўлишни истасангиз, кеча айтган гапингизга бугун тескари гапирмайсиз. Ҳар куни гапириш шарт эмас”, деган Макрон.
Шунингдек, у Трампнинг НАТО иттифоқчиларини танқид қилиши ва АҚШни альянсдан олиб чиқиш ҳақидаги таҳдидларига ҳам тўхталиб ўтган. Макроннинг фикрича, АҚШ Президенти ўзининг иттифоқ олдидаги мажбуриятларига нисбатан шубҳа уйғотиш орқали НАТОни заифлаштирмоқда.
Бундан ташқари, Макрон Трампнинг у ва рафиқаси Брижит ҳақидаги масхарали изоҳларига муносабат билдириб, буни фаросатга ҳам, стандартларга ҳам тўғри келмайдиган ҳаракат деб баҳолаган.
