Вашингтонда Америка – Ўзбекистон ишбилармонлар кенгаши иш бошлади
Вашингтонда Америка – Ўзбекистон ишбилармонлар ва инвестициялар кенгашининг расмий очилиш маросими бўлиб ўтди. Бу ҳақда Саида Мирзиёева ўз Телеграм-каналида маълум қилди.
Тадбирда кенгаш ҳамраислари – Ўзбекистон президенти администрацияси раҳбари Саида Мирзиёева ва АҚШ президентининг Жанубий ва Марказий Осиё бўйича махсус элчиси Сержио Гор иштирок этди.
Маросим аввалида томонлар икки томонлама ишбилармонлик ҳамкорлигининг асосий йўналишларини муҳокама қилдилар.
«Ушбу тузилма Ўзбекистон ва Америка Қўшма Штатлари ўртасидаги ишбилармонлик алоқаларини янада мустаҳкамлаш учун самарали майдон бўлади. Бунга мамлакатларимиз президентларининг қатъий сиёсий иродаси хизмат қилмоқда,» – деди Саида Мирзиёева.
Сержио Гор, шунингдек, Х нашридаги мақоласида кенгаш тузилгани ҳақида хабар бериб, кенгашнинг ишга туширилиши сўнгги ойларда тижорат дипломатияси туфайли эришилган ҳамкорликни ривожлантиришдаги сезиларли ютуқларнинг натижаси эканлигини таъкидлади.
У АҚШ президенти Доналд Трампнинг ноябрь ойида Вашингтонда C5+1 формати етакчилари билан учрашувидан сўнг Ўзбекистон Америка компаниялари билан юзлаб миллион долларлик шартномалар тузганини эслатди.
