Исроил бутун дунёни ҳимоя қилмоқда; Европа биздан ўрнак олиши керак
АҚШ билан ҳамкорликда Эронга қарши курашаётган Исроил Бош вазири Биньямин Нетаньяху: «Биз бутун дунёни ҳимоя қиляпмиз», — дея баёнот берди.
«Times of Israel» ва бошқа нашрларнинг хабар беришича, Нетаньяху Холокост қурбонларини ёд этиш куни муносабати билан ёзиб олинган нутқида Европанинг ҳозирги сиёсатини кескин танқид қилган.
Бош вазирнинг таъкидлашича, бугунги кунда Европа жиддий маънавий инқирозни бошдан кечирмоқда.
«Европа Холокостдан бери кўп нарсани унутиб қўйган. Исроил эса бугун ана шу қитъани ҳимоя қилмоқда. Европа ўзлигини, қадриятларини ва цивилизацияни ваҳшийликдан асраш масъулиятини йўқотиб боряпти», — деди Нетаньяху.
Унинг фикрича, Европа Исроилдан кўп нарсани ўрганиши керак. Хусусан, яхшиликни ёмонликдан ажрата билиш ва ҳақиқат лаҳзаларида эзгулик учун жанг қилишга тайёр бўлиш тамойилларини ўзлаштириши лозимлигини таъкидлади.
