Mercedes компанияси ҳарбий техника ишлаб чиқаришни бошлаши мумкин
Бу ҳақда Mercedes-Benz Group бош директори Ола Каллениус маълум қилди.
«Дунё эртага нима юз бериши олдиндан айтиб бўлмайдиган маконга айланди ва менинг назаримда, Европа ўз мудофаа салоҳиятини кучайтириши кераклиги мутлақо кундай равшан. Агар биз ушбу жараёнда ижобий рол ўйнай олсак, бунга тайёрмиз», — дейди Каллениус.
Шу билан бирга, Ола Каллениус янги мудофаа бизнес иттифоқи умумий портфелининг фақат «арзимас улушини» ташкил этишини қайд этди. Бироқ, унинг фикрича, айнан шу соҳа «ўсиб борувчи тармоқга» айланиши мумкин.
Аввалроқ Volkswagen ҳам қурол-яроғ ишлаб чиқариш билан шуғулланиши мумкинлиги маълум бўлган эди. Апрел ойида Financial Times газетаси Volkswagen Исроилнинг Rafael Advanced Defense Systems мудофаа компанияси билан эҳтимолий ҳамкорлик бўйича музокаралар олиб бораётгани ҳақида хабар берганди. Томонлар Volkswagen’нинг инқирозни бошдан кечираётган Оснабрюкдаги заводини Исроилнинг «Темир гумбаз» ракетага қарши мудофаа тизими компонентларини ишлаб чиқариш учун қайта жиҳозлашни режалаштирмоқда.
