Калланг ишламаса, айбни бошқадан излама!..
«Қизил кўйлакли аёл»нинг ваҳимаси фейк бўлиб чиқди: Сигирнинг еми билан буғдойни фарқига бормаганлар фош бўлди!
Кеча ижтимоий тармоқларда, хусусан Фейсбук ўзбек сегментида ҳақиқий тўполон бошланди. Қизил кўйлак кийган бир аёл Ўрта Чирчиқ туманидаги далалардан биридан туриб видео чиқиш қилди ва: «Мана, 10-15 кунда пишиб етиладиган тайёр буғдойни ўриб ташлашяпти, бу қандай бедодлик!» дея бонг урди. Халқ ваҳимага тушди, изоҳларда норозиликлар авж олди…
Аммо бугун Тошкент вилояти ҳокимлиги ва Ўрта Чирчиқ тумани масъуллари ушбу «шов-шувли» видеога нисбатан расмий муносабат эълон қилиб, вазиятга нуқта қўйди. Маълум бўлишича, видео муаллифи бўлган аёл оддийгина сигир еми билан инсон истеъмол қиладиган буғдойни умуман фарқига бормаган!
Буғдой эмас, «Тритикале»: Аёл нимадан адашди?
Ҳокимликнинг маълум қилишича, ижтимоий тармоқларда шов-шув бўлган ўша майдондаги экин аслида анъанавий ғалла (буғдой) эмас. Бу — чорва моллари учун ўта тўйимли озуқа ҳисобланган «Тритикале» бошоқли дон экинидир!
Ҳа, ушбу ўсимлик ташқи кўринишидан буғдойга жуда-жуда ўхшаб кетади, лекин у инсонлар учун эмас, балки сигирлар учун экилади. Видео қаҳрамони бўлган аёл эса мутахассис бўлмай туриб, далага кириб ваҳима тарқатган ва ўзи билмаган ҳолда тармоқ кузатувчиларини алдаб қўйган.
300 бош қорамол учун ширин «силос»: Иш қонунийми?
Маълум бўлишича, жорий йилнинг 18–19-май кунлари Д002 avtomobil йўлининг “Kim Pen Xva” ҳудудида жойлашган 25,75 гектар майдондаги ушбу экинларни “ECO WHEELS” МЧЖ қонуний равишда ўриб олган.
Энг қизиғи, бу ер майдони Президентнинг 2025-yil 3-fevraldagi тегишли фармойиши асосида, расмий аукцион савдолари орқали қонуний сотиб олинган. Корхона ўзининг 600 бош зотдор қорамоли учун қишки емиш — «силос» заҳирасини шакллантириш мақсадида экинни эрта ўриб олган.
Мутахассисларнинг айтишича, «Тритикале» экини айниқса сут ва гўшт йўналишидаги чорвачилик учун кони фойда. Уни дони тўлиқ пишиб етилмасдан, мана шундай яшил ва ширали ҳолатида ўриб, силос қилиш — бутун дунёда қўлланиладиган оддий агротехник амалиётдир!
Тармоқлар назоратда: Ҳокимликнинг тезкорлигига таҳсин!
Ушбу вазиятда битта қувонарли ҳолат бор — Тошкент вилояти ҳокимлиги ва маҳаллий масъуллар интернетдаги хабарларга жуда эътиборли эканини кўрсатди. Ижтимоий тармоқдаги фейк ва асоссиз ваҳимага бир кун ўтмай туриб, расмий ва асосли жавоб қайтарилди. Мана буни — халқ билан ишлаш, ахборот маконини назорат қилиш дейилади!
Азиз блогерлар ва ижтимоий тармоқ фаоллари! Сиздан илтимос, кейинги сафар далага чиқиб видео олишдан олдин, қўлингиздаги ўсимлик буғдойми ёки сигирнинг емими — аввал яхшилаб суриштириб, кейин «бомба» ясанг. Акс ҳолда, мана шундай кулгили ва ноқулай вазиятда қолиб кетаверасиз!
