Моуриньюнинг «Реал»га расман қайтиш вақти маълум бўлди
Жозе Моуринью Мадриднинг «Реал» клубига қайтмоқда. Португалиялик мутахассис фаолиятида иккинчи бор «қаймоқранглилар» бош мураббийига айланади. Бу ҳақда Флорентино Перес президентлик сайловларидаги ғалабасидан сўнг маълум қилди.
Журналист Хосе Луис Санчеснинг берган маълумотларига кўра, клуб «The Special One» тайинланганини бугун, яъни душанба куниёқ расман эълон қилади. Мураббийнинг тақдимот маросими эса, катта эҳтимол билан, чоршанба куни бўлиб ўтади.
Эслатиб ўтамиз, Моуринью ўзининг дастлабки ташрифи даврида «Реал»ни уч йил давомида — 2010 йилдан 2013 йилгача бошқарган эди. Ушбу мутахассис қўл остида жамоа бир мартадан Ла Лига, Испания Кубоги ва мамлакат Суперкубогида зафар қучган, шунингдек, уч бор Чемпионлар лигасининг ярим финалига қадар етиб борган.
