АҚШ ва Эрон ўртасидаги урушни тўхтатиш бўйича меморандум келаётган якшанба куниёқ имзоланиши мумкин

Бу ҳақда Ғарбдаги дипломатик манбаси таяниб Reuters хабар берди. Манбага кўра, меморандум матни ҳали ҳам якуний босқичда кўриб чиқилмоқда. Хусусан, Эрон келишув Ливандаги жангларни ҳам тўхтатиши керак деган ўз позициясида қатъий турибди. Ливан жанубига бостириб керган Исроил у ерда “Ҳизбуллоҳ” билан уруш олиб бормоқда.

«Мақсад шанба кунигача келишувни матн шаклини якунлашдан иборат. Токи битим АҚШ вице-президенти Жей Ди Вэнс ва Эрон парламенти спикери Муҳаммад Боқир Ғолибоф томонидан имзоланиши мумкин бўлсин. Ҳозирча учрашувнинг аниқ жой белгиланмаган, бироқ Швецариянинг Женева шаҳри энг эҳтимолий вариант бўлиб турибди», — деди Reuters манбаси.

Эроннинг юқори мартабали амалдорига кўра, келишув лойиҳаси – Эрон нефтига қўйилган санкцияларни бекор қилади, унинг миллиардлаб долларлик маблағларини музлатишдан чиқаради ва барча фронтларда, жумладан Ливанда ҳам ҳарбий ҳаракатларни тўхтатишни талаб қилади.

Ядровий масалалар кейинги музокаралар учун четга суриб турилади. Вашингтон Эрон ҳеч қачон ядро қуролини ишлаб чиқармаслигини таъминлайдиган келишувни хоҳлайди. Эрон эса бундай қуролга интилмаётганини айтади.

Теҳрондаги манба Эрон бунинг эвазига нима таклиф қилиши мумкинлиги ҳақида ҳеч нарса айтмаган. АҚШ ҳозирча муносабат билдирмади.