Ташиев унга қарши суд ҳукми эълон қилинганидан 1 кун ҳам ўтмай футбол кўриш учун стадионга борди
Қирғизистон Миллий хавфсизлик давлат қўмитаси собиқ раиси Қамчибек Ташиев мамлакат Премер-лигасининг “Мурас Юнайтед” ва “Асиягол” жамоалари ўртасидаги учрашувига борган. Ўйин Манас шаҳридаги “Қурманбек” стадионида бўлиб ўтган. Ижтимоий тармоқларда эълон қилинган кадрларда Ташиев стадионнинг VIP-меҳмонларга мўлжалланган қисмига ўтаётганини кўриш мумкин.
Аввалроқ Бишкек суди “75 лар хати” деб аталган жиноят иши бўйича ҳукм чиқарганди. Қамчибек Ташиев ҳокимиятни куч билан эгаллашга тайёргарлик кўриш моддаси бўйича айбдор деб топилган. Унга мол-мулки мусодара қилинган ҳолда тўрт йилга озодликдан маҳрум этиш жазоси берилди.
Шу билан бирга, суд унга нисбатан уч йиллик пробация назоратини қўллади. Шу тариқа, Миллий хавфсизлик қўмитаси собиқ раиси озодликдан маҳрум этиш жазосини амалда ўтамайди. Қамчибек Ташиев мансаб ваколатини суиистеъмол қилиш айблови бўйича оқланган. Унинг адвокати ҳукм устидан шикоят қилиш ниятида эканини билдирганди.
