Путин Украина билан тинчлик музокараларини ўтказишни рад этиб, ҳарбий ҳаракатларни янада кучайтирмоқчи — Reuters
Агентликнинг Кремлга яқин манбаларига таяниб хабар беришича, Киевнинг Россия нефт заводлари ва портларига берган сўнгги дрон зарбалари Путиннинг урушни давом эттириш бўйича қарорини янада мустаҳкамлаган.
Аноним қолишни истаган икки манбанинг сўзларига кўра, 2022 йил февралда бошланган ушбу урушда Путин вазиятни янада кескинлаштириши кутилмоқда. Уларнинг фикрича, яқин ойларда уруш кўлами кенгайиши эҳтимоли жуда юқори.
«Путин Донбасс вилоятининг қолган қисмини эгаллаш борасидаги асосий мақсадидан қайтмаяпти. Аммо бу йил Россия армиясининг ушбу ҳудуддаги илгарилаши секинлашган. Путин яқинда ҳозирги фронт чизиғи бўйлаб ўт очишни тўхтатиш ва муросага келишни таклиф қилган бир гуруҳ маслаҳатчиларини койиган», — деди Reuters суҳбатдоши.
Бошқа бир манба эса Путин Россия тез орада Донбассни тўлиқ эгаллашига ишонишини айтди. Россия президенти июн ойида Зеленскийнинг учрашув ўтказиш ва ўт очишни тўхтатиш ҳақидаги чақириғини ҳам очиқчасига рад этганди.
Украина президенти офисининг юқори мартабали расмийси разведка маълумотларига таяниб, Путин тинчликка эмас, урушни давом эттиришга тайёрланаётганини айтди. Бунга Украинадаги янги амалиётлар ёки бошқа Европа давлатига эҳтимолий ҳужум ҳам кириши мумкин.
Россиялик ҳарбий экспертлар оммавий равишда вазиятни кескинлаштиришни, жумладан, Болтиқбўйи мамлакатларидаги NATO базалари каби Европа нишонларига зарба беришни муҳокама қилмоқда. Бу қадам Россияни АҚШ етакчилигидаги иттифоқ билан тўғридан тўғри тўқнашувга олиб келиши мумкин. NATO билан кескинликнинг ортиши Путинга Россия ичида янги сафарбарлик эълон қилиш учун сиёсий баҳона бўлади.
Россия Донбассни эгаллаши учун ҳали кўп вақт ва катта талофатлар керак бўлади. CCIS таҳлил маркази ҳисоб-китобларига кўра, 2022 йил бошидан бери урушда 2 миллионга яқин аскар ҳалок бўлган, яраланган ёки бедарак йўқолган. Уларнинг 1,4 миллион нафари россияликлардир. Расман ҳеч бир томон талофатлар сонини очиқламайди.
