Хитойда COVID-19 билан касалланиш кескин ошди
Хитойда COVID-19 билан касалланиш ҳолатлари яна кўпаймоқда. Хитой Касалликларни назорат қилиш ва олдини олиш маркази маълумотларига кўра, июнь ойида мамлакатда 79 мингта тасдиқланган инфекция ҳолати қайд этилган.
Уларнинг 130 нафари оғир аҳволда бўлган, бир бемор эса вафот этган.
Таққослаш учун, май ойида қарийб 21,9 минг, апрель ойида эса 23,5 мингта COVID-19 ҳолати аниқланган. Мутахассислар касалланиш ўсиш тенденцияси сақланиб қолаётганини қайд этмоқда.
Маълум қилинишича, июнь ойида қайд этилган барча ҳолатлар Омикрон варианти билан боғлиқ бўлган. Шу билан бирга, мутахассислар вируснинг янги штаммлари пайдо бўлганини тасдиқловчи аломатлар аниқланмаганини билдирди.
