Халқаро жиноят суди инқирозда – DW
Вашингтон Гаагадаги Халқаро жиноят судига (ХЖС) қарши янги кампания бошланганини эълон қилиб, мамлакатларни ХЖС фаолият юритадиган Рим статутидан чиқишга чақирди.
Давлат котиби Марко Рубио «ХЖС АҚШ суверенитетига таҳдид солмоқда», деб баёнот берди. Вашингтон суд ходимларига нисбатан янги чекловлар, жумладан, судьялар ва прокурорларга виза тақиқлари ҳамда санкциялар жорий этишга тайёрланмоқда.
Шу билан бирга, ХЖС бош прокурори Карим Хонга қарши жинсий шилқимлик айблови туфайли суд ички инқирозни бошдан кечиряпти.
Судга аъзо давлатларга тақдим этилган тергов маълумотларига кўра, прокурор собиқ қўл остидаги ходим билан бўлган муносабатларда ўз мансаб ваколатларини суиистеъмол қилган бўлиши мумкин. Хон айбловларни рад этиб, уларни ўз ишини обрўсизлантиришга уриниш деб атади.
Хон 2021 йилдан буён ХЖС прокуратурасини бошқариб келади ва Владимир Путинга нисбатан украиналик болаларни депортация қилиш иши бўйича ҳибсга олиш ордерини қўлга киритиб, жаҳон миқёсида танилган.
У, шунингдек, Исроил бош вазири Бинямин Нетаняҳу ва собиқ мудофаа вазири Йоав Галантга нисбатан Ғазо секторидаги уруш билан боғлиқ жиноятлар бўйича ҳибсга олиш ордерларини чиқаришни ташаббус қилган эди. Карим Хоннинг келажаги борасидаги қарор 24 июл куни қабул қилиниши керак.
Овоз бериш натижаларидан қатъи назар, ХЖС жиддий обрў-эътибор йўқотиши мумкин. Шу билан бирга, Европа Иттифоқи аллақачон судни АҚШ босимидан ҳимоя қилди ва бир қатор давлатлар Украина, Ғазо ва Судан бўйича терговларга ишончни сақлаб қолиш ҳозирги пайтда муҳим аҳамиятга эга деб ҳисоблайди, дейилади нашр хабарида.
