Австрия Украинанинг ЕИга тезлаштирилган тартибда аъзо бўлишига қарши чиқди
»Сўров бўйича турбо-аъзолик — бу, албатта, имконсиз нарса», — деди Австриянинг Европа, интеграция ва оила ишлари бўйича вазири Клаудиа Бауэр. У сўнгги ойларда «тез-тез эътиборни ўзига қаратиб, ЕИга кириш санасини белгилаб беришни хоҳлаган» Украина президенти Владимир Зеленскийни танқид қилди.
У Киев ЕИга дастлаб чекланган ваколатлар билан қўшилиши мумкин бўлган икки босқичли аъзолик моделидан огоҳлантирди.
«Барча номзод мамлакатлар, шу жумладан Украина ҳам ягона қоидаларга амал қилиши ва ўз натижалари билан аъзоликка лойиқ бўлиши керак», — дея сиёсатчининг сўзларидан иқтибос келтиради dpa агентлиги.
Бауэр Европа Иттифоқи янги аъзоларни қабул қилиш имкониятини «синчковлик билан баҳолаши» кераклигини таъкидлади ҳамда «39 миллион аҳолиси ва мутлақо бошқача қишлоқ хўжалиги тузилмасига эга Украинанинг аъзо бўлиши Европа Иттифоқини тубдан ўзгартиради», деган фикрни билдирди.
Аввалроқ Украина президенти Владимир Зеленский ЕИга аъзолик нафақат Украина, балки бутун Европа учун асосий хавфсизлик кафолатларидан бири эканини тушунтириб, мамлакатининг 2027 йилгача ЕИ таркибига киришини талаб қилган эди.
