Роналду ва Анри илк бор драматик сериалда бирга иштирок этади
Футбол афсоналари Криштиану Роналду ва Тьерри Анри илк марта йирик телевизион драматик лойиҳада бирлашди. Goal.com маълумотига кўра, Саудиянинг «Ал-Насср» клуби ва Португалия терма жамоаси ҳужумчиси Криштиану Роналду Британия футболининг яширин жиҳатлари ҳақида ҳикоя қилувчи «Day 1s» номли сериални ишлаб чиқишда иштирок этмоқда.
41 ёшли Роналду лойиҳада нафақат ижрочи продюсер, балки экранда ҳам намоён бўлади. Унинг таъкидлашича, мазкур сериал фаолиятидаги янги ва қизиқарли босқич ҳисобланади. Лойиҳа «Kingsman» фильмлари режиссёри Мэттью Вон билан ҳамкорликда амалга оширилмоқда. Улар биргаликда UR•Marv Studios орқали кўнгилочар индустриясида янги ёндашувларни жорий этишни мақсад қилган.
Сериал сўнгги йиллардаги енгил кайфиятдаги футбол шоуларидан фарқли ўлароқ, Британия футболининг саҳна ортидаги ҳақиқий ҳаёти ва кескин рақобат муҳитини очиб беришга қаратилган. Суратга олиш ишлари Барнет ФК стадионида бошланган.
Асар воқеалари футбол агентлари дунёси атрофида ривожланади. Бош қаҳрамон — қудратли агент Стэнли Далтон образини машҳур актёр Дамиан Льюис гавдалантиради. Сюжет ғояси эса Тьерри Анрининг узоқ йиллик агенти Даррен Дин томонидан ишлаб чиқилган.
