Хитой давлат компанияси собиқ раҳбари порахўрлик учун 15 йилга қамалди
Хитойнинг йирик давлат корхоналаридан бири — «China First Heavy Industries» компанияси раҳбарининг собиқ ўринбосари Лу Вэнцзюнь пора олиш ва фирибгарлик ишлари бўйича айбдор деб топилиб, 15 йил муддатга озодликдан маҳрум этилди. Бу ҳақда ХХР Олий халқ суди хабар берди. Суднинг ижтимоий тармоқлардаги расмий саҳифаларида аниқлик киритилишича, собиқ мулозимга, шунингдек, 5,3 миллион юань (тахминан 736 минг АҚШ доллари) миқдорида жарима солинган.
Тергов материалларига кўра, Лу Вэнцзюнь 2002 йилдан 2022 йилгача бўлган йигирма йил давомида ўз мансаб ваколатларини суиистеъмол қилиб, турли хусусий ва юридик шахсларга лойиҳаларни қўлга киритиш, шартномалар имзолаш ҳамда маҳсулотларни сотишда кўмаклашган. Бунинг эвазига у умумий ҳисобда 67,98 миллион юань (тахминан 10 миллион АҚШ доллари) миқдорида ноқонуний маблағ орттирган.
Суд айбланувчининг ўз айбига тўлиқ иқрор бўлгани, тергов билан фаол ҳамкорлик қилгани ҳамда ноқонуний йўл билан топилган пул ва мулкларнинг катта қисмини ихтиёрий равишда давлатга қайтарганини инобатга олиб, унга нисбатан ўлим ёки умрбод қамоқ жазосини эмас, балки 15 йиллик муддатни тайинлади. Лу Вэнцзюнь ўз фаолияти давомида «China First Heavy Industries» корпорациясидан ташқари, Хитойнинг бошқа бир қатор йирик машинасозлик ва оғир саноат давлат корхоналарида ҳам юқори лавозимларда ишлаб келган эди.
