«Ал-Ҳилол» ҳужум чизиғи учун уч номдор футболчини кўзламоқда

Саудия Арабистонининг «Ал-Ҳилол» клуби янги мавсум олдидан ҳужум чизиғини кучайтириш мақсадида бир қатор юқори савияли футболчиларни кузатмоқда.

talkSPORT маълумотига кўра, клуб раҳбариятининг устувор мақсади «Бавария» ҳужумчиси Харри Кейнни таркибга қўшиб олиш ҳисобланади. Саудия клуби 33 ёшли англиялик футболчининг вакиллари билан эҳтимолий трансфер масаласида дастлабки музокараларни ҳам ўтказган.

Кейннинг Мюнхен клуби билан амалдаги шартномаси келаси йили ўз ниҳоясига етади. «Бавария» ҳужумчи билан ҳамкорликни давом эттириш ва янги келишув имзолаш тарафдори. Бироқ футболчининг ўзи фаолиятини Саудия Арабистонида давом эттириш эҳтимолини бутунлай рад этмаяпти.

«Ал-Ҳилол»нинг трансфер рўйхатидан яна икки таниқли ҳужумчи — «Галатасарой» форварди Виктор Осимхен ҳамда «Астон Вилла» аъзоси Олли Уоткинс ҳам жой олган.

Шу билан бирга, Англия клуби Уоткинсни жорий ёзги трансфер ойнасида сотиш ниятида эмас. «Астон Вилла» раҳбарияти футболчининг жамоада қолишига ишонч билдирмоқда.

Шу тариқа, «Ал-Ҳилол» янги ҳужумчи танлашда бир нечта вариант устида ишламоқда, бироқ клубнинг асосий эътибори айни пайтда Харри Кейн трансферига қаратилган.