Аргентина терма жамоасида 10-рақам кимга берилади?
Лионель Месси Аргентина терма жамоасидаги фаолиятини якунлагач, жамоанинг 10-рақамли либоси учун янги даъвогар маълум бўлди. Ҳозирча бош мураббий Лионель Скалони бу рақамни кимга бериши ҳақида якуний қарорга келмаган. Бу ҳақда ESPN Аргентина нашри хабар берди. Манбага кўра, Месси деярли йигирма йил давомида Аргентина терма жамоасининг 10-рақамли футболкасини кийиб келди. Энди эса бу рақам бўш қолди. Месси терма жамоада бўлмаган учрашувларда 10-рақамли либосни бир қанча футболчи кийган. Улар орасида Тиаго Алмада ва Франко Мастантуоно ҳам бор. Мастантуоно 2025 йилда Эквадорга қарши учрашувда 10-рақамда майдонга тушган. Айни пайтда Нико Пас 10-рақам учун асосий номзодлардан бири сифатида кўрилмоқда. 22 ёшли футболчи “Комо” сафида ҳам айнан шу рақамда ўйнайди. У ҳужумкор яримҳимоячи сифатида фаолият юритиб, ҳужумларни ташкил этишда муҳим рол ўйнайди. Франко Мастантуоно ҳам номзодлар қаторида. “Фиорентина” футболчиси чап оёқда ўйнайди ва одатда ўнг қанотдан ҳужум марказига қараб ҳаракат қилади. Унинг бу хусусиятлари Месси фаолиятининг сўнгги йилларидаги ўйин услубига қисман ўхшайди. Тиаго Алмада ҳам 10-рақам учун вариантлардан бири. У аввал Месси терма жамоада бўлмаган пайтларда ушбу рақамни олган ва Скалони жамоасининг ҳозирги таркибида муҳим футболчилардан ҳисобланади. Бироқ 10-рақамли либос Месси бажарган барча вазифаларни бир футболчи зиммасига олишини англатмайди. Терма жамоадаги вазифалар бир нечта футболчи ўртасида тақсимланиши мумкин. Энсо Фернандес, Алексис Макаллистер ва Родриго де Паул жамоа ўйинини бошқаришда, Пас, Алмада ёки Мастантуоно эса ҳужумларни ташкил этишда муҳим рол ўйнаши кутилмоқда. Шу сабабли Аргентина терма жамоасидаги 10-рақам эгаси Месси билан тўғридан-тўғри таққосланмаслиги керак. Энди Скалони олдида нафақат афсонавий рақамга янги футболчи тайинлаш, балки Мессисиз жамоанинг ўйин тизимини шакллантириш вазифаси турибди. Маълумот учун, аргентиналик футболчи “Олтин тўп”ни саккиз марта қўлга киритган. Бу кўрсаткич бўйича Месси мукофот тарихидаги рекордчи ҳисобланади. Месси Аргентина терма жамоаси сафида 207 та учрашувда майдонга тушиб, 125 та гол урган. У ҳар икки кўрсаткич бўйича ҳам терма жамоа рекордчисидир. Лео фаолияти давомида Жаҳон чемпионатида олти марта иштирок этган.
