Канар оролларига етиб боришга уринган 80 дан ортиқ африкалик муҳожир ҳалок бўлган
Гамбиядан Канар оролларига қайиқда етиб боришга уринган 80 дан ортиқ муҳожир ҳалок бўлгани тахмин қилинмоқда. Бу ҳақда BBC хабар берди.
Дастлабки маълумотларга кўра, қайиқ август ойи бошида Ғарбий Африкадан йўлга чиққан ва Атлантика океанида 27 кун давомида сузган. У Гран-Канария ороли соҳилидан, Аргинегин шаҳрининг жануби-ғарбий томонидан тахминан 120 километр узоқликда аниқланган.
Инсон ҳуқуқлари ҳимоячилари маълумотига кўра, қайиқда жами 127 киши бўлган. Уларнинг 83 нафари ҳалок бўлган деб тахмин қилинмоқда.
Қутқарувчилар 44 нафар тирик қолган муҳожирни ҳамда қайиқда қолган беш нафар марҳумнинг жасадини аниқлаган. Кучли шамол ва баланд тўлқинлар туфайли қолган жасадларни олиб чиқиш имкони бўлмаган.
Қутқарувчиларнинг маълум қилишича, тирик қолганларнинг барчаси Африка давлатларидан келган эркаклар бўлган. Оғир аҳволдаги уч нафар муҳожир вертолётда касалхонага етказилган, қолганлари эса 3 сентябрь куни эрталаб қайиқдан туширилган.
Ғарбий Африкадан Канар оролларигача бўлган Атлантика йўли дунёдаги энг хавфли миграция йўналишларидан бири ҳисобланади. Кучли тўлқинлар, океан оқимлари ва узоқ масофага қарамай, ҳар йили минглаб муҳожирлар ушбу йўл орқали Испанияга етиб боришга ҳаракат қилади.
