44 йиллик можаро яна авж олди: Аргентина Фолкленд оролларини қайтариш учун ҳаракат бошлади
Аргентина президенти Хавьер Милей Британия назоратидаги Фолкленд ороллари — Аргентинада Малвин ороллари деб аталадиган ҳудуд бўйича мамлакатнинг даъвосини янада кучайтирди.
Милей ороллар атрофида нефть қазиб олиш билан шуғулланаётган компанияларга нисбатан санкциялар жорий этиш ниятини маълум қилди. Шунингдек, у Аргентина Конгрессига мамлакат суверенитетини ҳимоя қилиш механизмларини кучайтирувчи қонун лойиҳасини киритишини айтди.
Бу баёнотнинг яна бир қизиқ жиҳати — у АҚШ президенти Дональд Трамп Вашингтоннинг Фолкленд бўйича нейтрал позициясини қайта кўриб чиқаётганини билдирганидан бир неча кун ўтиб янгради. Милей бу вазиятни Аргентина манфаатлари учун «ўзгариш шамоллари» эсаётганининг белгиси сифатида баҳолаган.
Британия эса ороллар аҳолисининг ўз тақдирини белгилаш ҳуқуқини ҳимоя қилишини билдирмоқда. 2013 йилги референдумда Фолкленд аҳолисининг мутлақ кўпчилиги Британиянинг денгизорти ҳудуди мақомини сақлаб қолиш тарафдори бўлган.
Фолкленд масаласи икки мамлакат муносабатларида ўта оғриқли мавзу ҳисобланади. 1982 йилда Аргентина ва Буюк Британия ороллар учун урушган ва можаро Аргентинанинг мағлубияти билан якунланган. Энди эса ҳудуд атрофидаги нефть лойиҳалари эски сиёсий низони яна кун тартибига олиб чиқмоқда.
