Хитойда олимлар денгиз сувидан уран ажратиб олишни ўрганишди
Улар буни АҚШ Энергетика вазирлиги белгилаган мақсадли кўрсаткичдан ҳам юқори самарадорликда амалга ошириб, ядровий ёқилғи сифатидаги океан захираларини ўзлаштириш бўйича глобал пойгада Хитойни етакчилар қаторига олиб чиқди. Олимлар кимёвий «тузоқ» вазифасини бажарадиган махсус материал яратди. Тадқиқотчилар табиий денгиз сувидан бир грамм адсорбент ҳисобига 50,4 мг гача уран ажратиб олишга эришди. Бу кўрсаткич АҚШнинг бир грамм учун 6 мглик мақсадидан 8 баравар юқори. Таъкидланишича, бу технология Хитой учун айниқса муҳим, чунки мамлакат уранни ўзи қазиб чиқараётганидан анча кўп миқдорда истеъмол қилади.
