Германия пандемиядан кейинги умумевропа қарзлари учун 150 миллиард евродан ортиқ тўлаши мумкин
Германия пандемиядан кейинги Европа Иттифоқининг тикланиш жамғармаси бўйича тўловлар учун якунда 145–154 миллиард евро сарфлаши мумкин. Welt нашри ҳисоб-китобларига кўра, бу ҳар бир солиқ тўловчига қарийб 2000 евродан тўғри келади.
Жамғарма 2020 йилда Ангела Меркель ва Эммануэль Макрон ўртасида эришилган келишувдан сўнг ташкил этилган. Унда Европа Иттифоқи томонидан 750 миллиард еврогача миқдорда биргаликда қарз олиш кўзда тутилган.
Ҳозирга қадар тикланиш жамғармасидан 648 миллиард евродан қарийб 440 миллиард евроси ажратилган. Энг йирик маблағ олувчи Испания бўлган — унга қарийб 90 миллиард евро берилиши керак. Шу билан бирга, пандемиядан кейин Испания иқтисодиёти Германия иқтисодиётига нисбатан анча тез ўсган: Eurostat маълумотларига кўра, 2021 йилдан бери Испания иқтисодиётининг йиллик ўсиши 2,5 фоиздан пастга тушмаган.
Германиядаги сиёсатчилар маблағларни тақсимлаш механизмини танқид қилмоқда. Эркин демократик партия (СвДП)дан европарламент депутати Мориц Кёрнер BILD нашрига берган интервьюсида Германия «ўз иқтисодиёти пандемиядан кейин кўплаб ёрдам олувчи давлатларникига қараганда ёмонроқ ривожланган бўлса-да, бошқа мамлакатларга миллиардлаб евро ўтказмоқда», деди.
У, шунингдек, Европа прокуратураси жамғарма маблағларидан эҳтимолий суиистеъмол қилиш билан боғлиқ юзлаб иш бўйича тергов олиб бораётганини таъкидлади.
Лондон иқтисодиёт мактаби иқтисодчиси Иэн Бегг BILD билан суҳбатда жамғарма ташкил этилган пайтда «Меркель еврозонанинг парчаланишидан хавотирлангани, бу эса айниқса Германияга қаттиқ зарба бериши мумкинлигини» эслатди.
