Нурсултон Рўзибоев UFC рейтингидаги топ-15ликни тарк этди
Франциянинг Париж шаҳрида ўтказилган UFC Fight Night турниридан кейин ўрта вазн тоифасининг янгиланган рейтинги эълон қилинди.
84 килограммгача бўлган вазн тоифасида иштирок этувчи ўзбекистонлик Нурсултон Рўзибоев британиялик Майкл «Веном» Пейжга очколар ҳисобига кўра имкониятни бой бергач, топ-15 рейтингни тарк этди. Унинг ўрнини америкалик Жаред Канноне эгаллади.
Бу Рўзибоевнинг профессионал MMA фаолиятидаги 10-мағлубияти бўлди. Ўзбекистонлик жангчининг умумий рекорди ҳозирда 37 та ғалаба, 10 та мағлубият ва 2 та дурангни ташкил этмоқда.
Рўзибоев UFC доирасидаги еттинчи жангида иккинчи марта мағлубиятга учради. Шу тариқа, унинг промоушендаги кўрсаткичи 5 та ғалаба ва 2 та мағлубиятдан иборат.
39 ёшли Майкл Пейж эса UFC’да 2024 йил март ойидан бери иштирок этиб келмоқда. Британиялик спортчининг промоушендаги натижаси 5 та ғалаба ва 1 та мағлубият бўлса, умумий MMA рекорди 26-3 кўринишида.
