Пентагон: Эронга қарши уруш АҚШда ўқ-дорилар танқислигига олиб келди
Пентагон бош инспектори ҳисоботида Эронга қарши уруш АҚШ ҳарбийларида ўқ-дорилар танқислиги ва қурол-яроғ етказиб бериш занжирларида узилишларга олиб келгани қайд этилди.
Тасним агентлиги хабар беришича, АҚШ Ҳарбий департаменти бош инспекторининг Эрон можаросига бағишланган илк очиқ ҳисоботи 28 февралдан 30 июнгача бўлган даврни қамраб олган. Ҳужжатда Пентагон танқисликни бартараф этиш учун қурол-яроғ хариди ва ишлаб чиқаришни тезлаштираётгани, етказиб бериш муддатларини қисқартираётгани ҳамда хомашё, бутловчи қисмлар ва айрим муҳим ўқ-дорилар захирасини кўпайтираётгани айтилган.
Ҳисоботга кўра, уруш АҚШга ҳозиргача тахминан 33,4 миллиард долларга тушган. Шундан 22,3 миллиард доллари ишлатилган ўқ-дориларга, 3,7 миллиард доллари йўқотилган ҳарбий техникага, 7,4 миллиард доллари эса бошқа харажатларга тўғри келади. Бузилган инфратузилмани таъмирлаш харажатлари бу ҳисобга киритилмаган.
Ҳужжатда АҚШ ҳарбий техникаси йўқотишлари ҳақида ҳам маълумот берилган. Унга кўра, камида 30 та йирик АҚШ дрони йўқ қилинган. Шунингдек, тўртта F-15E, битта F-35E, битта A-10, 12 та KC-135 ёнилғи қуйувчи самолёт ва яна тўққизта бошқа самолёт йўқ қилинган ёки жиддий шикастланган.
Ҳисоботда Эрон уруш давомида Баҳрайндаги АҚШ ҳарбий-денгиз кучларининг асосий логистика базасига дронлар ва баллистик ракеталар билан ҳужум қилгани расман биринчи марта қайд этилган. Шунингдек, минтақадаги бир қатор АҚШ базалари, разведка ва кузатув тизимларига жиддий зарар етказилгани айтилган.
Бош инспектор маълумотларига кўра, уруш даврида 20 мингдан ортиқ америкалик ҳарбий хизматчи ва дипломат бошқа жойларга кўчирилган. АҚШ самолётлари эса жанговор операцияларни қўллаб-қувватлаш мақсадида Европа базаларидан 5000 тагача парвозни амалга оширган.
Ҳисобот АҚШ ҳарбий вазири Пит Хегсет мамлакатда ўқ-дорилар захираси камайгани ҳақидаги хабарларни рад этган бир пайтда эълон қилинди. Президент Дональд Трамп ҳам яқинда АҚШда деярли «чексиз» ўқ-дори захираси борлигини айтган эди.
Бош инспектор ҳисоботида минтақада жойлаштирилган АҚШ қўшинларининг руҳий ҳолати баҳоланмаган. Сўнгги ҳафталарда бу масала Пентагон эътиборида бўлиб келмоқда, хусусан, «Авраам Линкольн» авианосецининг узайтирилган хизмат муддати ва ундаги ҳарбий хизматчиларнинг шароити юзасидан хавотирлар билдирилган.
