Туристлар учун Трамп кабинети нусхаси яратилди
АҚШда туристлар учун президент Дональд Трампнинг Овал кабинети нусхаси яратилди. Бу ҳақда Associated Press хабар берди.
У Оқ уй ёнидаги “Халқ уйи” музейига жойлаштирилган. Эндиликда ташриф буюрувчилар АҚШ президентининг иш жойи нусхаси билан танишиши мумкин. Ҳақиқий кабинетга кириш эса чекланган. Музейдаги нусха ҳам олтин ҳошияли улкан портретлар билан безатилган.
Бошқарув директори Люк Буради раҳбарлигида музейда ярқираб турувчи вазалар, олтинранг безаклар, турли декоратив буюмлар ва 24 та портретнинг нусхалари яратилган. Портретлар учун рамкалар ҳам асл нусхаларга айнан мослаб тайёрланган.
Малакали дизайнерлар жамоаси президент йўқлигида Овал кабинетига ташриф буюриб, у ердаги буюмларни ўрганган. Шимолий Каролинадан келган мутахассислар кабинетдаги девор безакларининг нусхаларини яратиш устида ишлаган. Яна бир мутахассис бошқа буюмларни 3D сканерлаш ва чиқариш билан шуғулланган.
Калифорниялик усталар Трамп танлаган 24 та портрет учун олтин рамкаларни қўлда ўйиб ясаган. Шунингдек, музейда АҚШ президентининг ҳозирги кабинетидаги каби иккита кўзгу ва Мустақиллик декларациясининг нусхаси ҳам мавжуд.
