Илон Маск Трампнинг Украина президентини алмаштириш ҳақидаги чақирувини қўллаб-қувватлади
Илон Маск Дональд Трампнинг Владимир Зеленскийни танқид қилиши ва Украина раҳбариятини алмаштиришга чақиришини қўллаб-қувватлади. АҚШ президентининг Украина Россиянинг нефтьни қайта ишлаш заводларига зарба бериши ёқилғи нархларининг ошишига сабаб бўлаётгани ҳақидаги баёнотига изоҳ бериб, Маск X ижтимоий тармоғида: «Зеленский ҳаддидан ошиб кетди», деб ёзди. Бошқа бир изоҳида эса: «Қўшиламан, Украинага янги раҳбар керак», дея қўшимча қилди.
Баҳс Трамп Владимир Путин билан Россия дизел ёқилғисининг жаҳон бозорига етказиб берилишини кўпайтириш бўйича келишувга эришганини эълон қилганидан сўнг авж олди.
Зеленский бу қарорни «адолатсиз ва инсофсиз» деб танқид қилди ва нефть маҳсулотлари экспортидан тушадиган қўшимча даромадлар Москвага урушни молиялаштиришда ёрдам беришини билдирди. Бунга жавобан Трамп Украинага Россия билан келишув тузишга қодир янги президент кераклигини айтди.
Шу билан бирга, Киев Москва Украина энергетика инфратузилмасига ҳужумларни бир вақтнинг ўзида тўхтатса, Россиянинг нефтьни қайта ишлаш заводларига зарбалар беришни тўхтатишга тайёрлигини билдирди. Зеленский бундай қадамлар ўзаро бўлиши кераклигини таъкидлади.
